ذاتَ بؤسٍ قديم.. يوم كانت شاشة التلفزيون في 24 بوصة.. ولها (إنتين) مربوط بسلك علاقية ملابس مْطَعْوَج فوق السطح.. قعدنا ثلاث سنين نحضر مسلسل مكسيكي اسمه (ماريمار).. كبرتُ وتزوّج ابن جيراننا وماتت عنزة (أم فتحي) بالبقعة.. و(ماريمار) بعدها واقفة عَ باب الفيلا مْفَنْجلة عيونها وبتعيّط..!

شو بدكو بطول السالفة.. هرّ و كُتّ شعر راسي.. وصرتُ (أبو وطن) و ناقص هزيمات والمديون للدكنجي.. واكتشفتُ أن (ماريمار) طلع سهرة قصيرة جدًا مقارنة بالمسلسل السخيف الممل الشغال عَ الفضائيات واسمه: (المفاوضات الأمريكية الإيرانية)..!! آه والله..!!

يلعن أبو هيك مفاوضات ما بتخلص..!! وَلَكْ شو هاظ..؟؟!!

كل أسبوعين بطلع واحد مكشّر من هون.. وواحد مْقَلْعَط من هناك.. بيجحروا في بعض قدّام الكاميرات وبهددوا: (الخيارات كلها على الطاولة)..!! وأنا كمواطن عربي شْلاطي قاعد عَ الحيط الواطي.. نفسي أعرف شو نوع خشب هالطاولة اللي حاملة طنعشر ألف خيار وملف نووي ولليوم ما انكسرت رجلها..!! (لو أنها طاولة سفرتنا كان زمان صارت حطب للصوبة..!!).

ركزوا معي.. بالنهار أمريكا بتهدد تشمط إيران عقوبات تخلّيها تشتهي الشلن.. وإيران بتتوعد تشعلِلْ المنطقة.. والمحللون أصحاب الكروش الملبّية عَ الأصلي بصرخوا: الحررررب قااااادمة..!! وبالليل.. وإحنا بنرجف تحت الحرامات.. بكون الوفدان قاعدين بفنادق عشر نجوم باجمل اماكن.. بوكلوا هُبَر وزَفَر.. وبتبادلوا الرسائل الغرامية من تحت الطاولة..!!.

طبعًا بتقولوا: وإحنا شو دخلنا..؟؟ وَلَكْ ما هي كل جولة مفاوضات بينهم بتطلع نتيجتها خازوق جديد برأس المواطن العربي المسخّم..!! همّ بختلفوا عَ تخصيب اليورانيوم.. وإحنا بتنطرد من جيوبنا آخر بريزة مطعوجة..!!

صفّ واطفِ التلفزيون.. فإحنا بهالمسلسل مجرد (كومبارس) بوكل الكفّ عَ وجهه وقفاه.. وطُ.. فيهم وفي مفاوضاتهم عَ الآلآلآلآلآخِرْ..!!

ــ الدستور